Франција распореди околу 2.000 војници на Блискиот Исток со цел да придонесе за заштитата на своите сојузници во Персискиот Залив, особено Катар и Кувајт. Информацијата ја соопшти началникот на Генералштабот на француските вооружени сили, генералот Фабиен Мандон.
Обраќајќи се пред пратениците во Француското национално собрание, Мандон откри дека Париз разговара и со Саудиска Арабија за можноста француските воени капацитети да бидат вклучени во заштитата на нафтениот терминал Јанбу.
Станува збор за објект од особено значење за трговијата со јаглеводороди, кој претходно бил цел на напад.
„Моментално сме во фаза на дискусија со Саудиска Арабија. Разгледуваме различни опции за заштита на терминалот Јанбу, што беше нападнат и е од клучно значење за трговијата со јаглеводороди“, изјави Мандон.
Распоредувањето на француските војници е дел од пошироките напори на Париз за поддршка на сојузниците во регионот, во услови на влошена безбедносна состојба на Блискиот Исток.
Можниот ангажман околу терминалот Јанбу дополнително ја покажува важноста на заштитата на енергетската инфраструктура, особено по нападите што ја загрозуваат стабилноста на снабдувањето и меѓународната трговија со енергенси.
