Фудбалската федерација на Македонија (ФФМ) соопшти дека не го прифатила барањето на ФК Вардар за одложување на натпреварот од првото коло во Првата македонска фудбалска лига за сезоната 2026/2027.
Од федерацијата информираат дека календарот за натпреварување во Првата и Втората МФЛ, како и Купот на Македонија, веќе е усвоен од надлежните органи и поради густината на распоредот нема можност за дополнителни промени.
Новата сезона во Првата МФЛ ќе се игра во формат од 36 кола, поради што, според ФФМ, потребно е строго почитување на однапред утврдениот распоред.
Од федерацијата додаваат дека при креирањето на календарот бил земен предвид и спортскиот аспект, особено потребите на клубовите кои настапуваат во европските натпреварувања, со ритам на одигрување натпревари четврток – недела – четврток.
ФФМ потсетува дека и минатата сезона не биле прифатени барања за одложување на натпревари од клубови кои настапувале во натпреварувањата на УЕФА, поради принципот на еднаков третман.
Според утврдениот распоред, натпреварот од првото коло на Првата МФЛ ќе се одигра на 25 јули 2026 година.
