Американските безбедносни служби заплениле повеќе од 700 дронови кои неовластено летале во близина на стадионите и навивачките зони од почетокот на Светското првенство на 11 јуни, соопшти Федералното биро за истраги.
За време на одигрувањето на натпреварите важи целосна забрана за летачки активности, вклучително и користење дронови, во радиус од околу 5,6 километри околу стадионите и до височина од 914 метри, освен со претходно одобрение од контролата на летање.
Од ФБИ информираат дека дронови биле откриени и запленети во забранетиот воздушен простор во сите 11 американски градови домаќини на Мундијалот, а поради прекршување на правилата биле приведени и повеќе лица.
Федералната управа за воздухопловство воведе десетици привремени ограничувања за летови, со кои се забранува употреба на дронови во близина на стадионите и другите локации каде што се одржуваат натпреварите.
Во навивачките зони забраната важи во радиус од околу 1,9 километри и до височина од 305 метри.
Според ФБИ, лицата што без дозвола ќе управуваат со дронови во забранетиот воздушен простор може да се соочат со парична казна до 100.000 долари, кривична постапка и трајно одземање на леталото.
Со цел да се гарантира безбедноста на натпреварите и посетителите, ФБИ распоредил специјализирани тимови околу стадионите кои се задолжени за откривање и неутрализирање на неовластени дронови.
