Девет европски држави побараа од Европската комисија да ги продолжи привремените мерки за флексибилност при примената на новиот Систем за влез и излез (EES). Во заедничко писмо до еврокомесарот за внатрешни работи Магнус Брунер, Белгија, Франција, Германија, Грција, Италија, Малта, Холандија, Португалија и Швајцарија предупредуваат дека системот сè уште се соочува со сериозни оперативни предизвици. Земјите нагласуваат дека остануваат посветени на целосната имплементација на системот, но бараат продолжување на вонредниот механизам и по 6 септември годинава.
Тој механизам им овозможува на граничните служби во исклучителни ситуации привремено да не земаат отпечатоци од прсти и скенирање на лицето на патниците за да се избегнат долги гужви. Притоа, сите влезови и излези од Шенген-зоната и понатаму се евидентираат. Земјите бараат Европската комисија навреме да достави писмени гаранции дека мерките ќе бидат продолжени.
Од Европската комисија велат дека постојното законодавство веќе овозможува одреден степен на флексибилност при спроведувањето на системот. Портпаролот Маркус Ламерт изјави дека Комисијата останува во постојан контакт со земјите кои се соочуваат со проблеми на граничните премини. Тој оцени дека постои силна заедничка волја системот успешно да функционира во сите држави-членки.
Во меѓувреме, аеродромите, авиокомпаниите и траектните превозници предупредуваат дека новиот систем создава долги редици и сериозни оперативни потешкотии во текот на летната туристичка сезона. Според нив, техничките и организациските проблеми веројатно нема целосно да бидат надминати до почетокот на септември. Европската комисија засега не најавува продолжување на привремените мерки, иако притисокот од земјите-членки и транспортниот сектор сè повеќе се зголемува.
