Четириесет и четири европски индустриски здруженија бараат од земјите членки на Европската Унија итно да преземат мерки против, како што наведуваат, нефер трговските практики на Кина. Според нив, ваквите практики го загрозуваат европското производство и ја зголемуваат опасноста од нови отпуштања и губење работни места.
Повикот доаѓа во пресрет на состанокот на лидерите на ЕУ во Брисел, закажан за следната недела, на кој една од главните теми ќе биде растечкиот трговски дефицит со Кина. Неговата вредност, според наведените податоци, надминува една милијарда евра дневно.
Меѓу потписниците на повикот се здруженија од металургијата, хемиската индустрија и производството на автомобилски делови. Тие сметаат дека Европската Унија треба поефикасно да ги користи постојните механизми за трговска заштита, но и да развие поширок пристап што ќе ги опфати целосните синџири на производство и снабдување.
Притоа, предупредуваат дека новите мерки треба да бидат внимателно осмислени за да не предизвикаат негативни последици за блиските европски партнери, како Велика Британија, Норвешка и Швајцарија.
Индустриските здруженија бараат и дополнително зајакнување на капацитетите на Европската комисија, вклучително и ангажирање повеќе персонал за побрзо разгледување на жалбите. Тие предлагаат и воведување нови механизми со кои ќе се реагира на нарушувањата на пазарот предизвикани од државната интервенција.
На претстојниот самит во Брисел, европските лидери ќе разговараат и за француско-германските предлози за проширување на мерките за трговска заштита, објавени во понеделникот.
Во меѓувреме, европскиот комесар за трговија Марош Шефчович ја завршува дводневната посета на Пекинг, во рамките на напорите за решавање на трговските несогласувања меѓу ЕУ и Кина.
Според најавите, Шефчович се обидува да ја убеди кинеската страна да го ограничи извозот во Европската Унија во одреден сектор, најверојатно поврзан со хибридните автомобили.
