Претседателот на Европскиот совет, Антонио Кошта, оваа недела започнува повеќедневна официјална турнеја низ Западен Балкан, со цел зајакнување на политичкиот дијалог со земјите од регионот и потврдување на европската перспектива, соопшти Европскиот совет.
Посетата ќе трае од 1 до 5 јуни и опфаќа серија средби со државни и владини лидери, како и учество на Самитот ЕУ–Западен Балкан, кој ќе се одржи на 5 јуни во Тиват, Црна Гора. Главните теми на разговорите ќе бидат проширувањето на Европската унија, постепената интеграција, регионалната соработка, како и прашањата поврзани со безбедноста и стабилноста во регионот.
Кошта порача дека неговата нова регионална турнеја претставува јасен сигнал за континуираната поддршка на Европската унија кон Западен Балкан. „Мојата втора турнеја низ Западен Балкан испраќа јасен сигнал: посветеноста на Европската унија кон регионот е реална, исто како и можноста за проширување. Моментумот постои. Сега е време за резултати“, изјави тој.
Патувањето започнува на 1 јуни во Сараево, каде што Кошта ќе се сретне со членовите на Претседателството на Босна и Херцеговина – Денис Беќировиќ, Жељка Цвијановиќ и Жељко Комшиќ, како и со претседателката на Советот на министри, Борјана Кришто.
Следниот ден, на 2 јуни, тој ќе престојува во Тирана, со средби со албанскиот премиер Еди Рама, претседателот Бајрам Бегај, како и со студенти од Колеџот на Европа. Истиот ден ќе пристигне во Скопје, каде што ќе оствари средба со премиерот Христијан Мицкоски, по што е најавена заедничка прес-конференција во 18:30 часот.
На 3 јуни Кошта ќе биде во Приштина, каде ќе разговара со вршителката на должност претседател Албулена Хаџиу, премиерот во заминување Албин Курти и претставници на опозициските партии.
Турнејата продолжува на 4 јуни во Белград, со средби со претседателот Александар Вучиќ, претседателката на парламентот Ана Брнабиќ и претставници на граѓанското општество.
Посетата ќе заврши во Црна Гора, каде претседателот Јаков Милатовиќ ќе организира свечена вечера во Тиват по повод 20-годишнината од обновувањето на независноста. На 5 јуни, Кошта ќе копретседава со Самитот ЕУ–Западен Балкан, кој ќе биде посветен на „заедничкиот просперитет и стабилност на Европската унија и регионот“.
Од Европскиот совет информираат дека во сите градови ќе бидат организирани прес-настани, а фото и видео материјалите ќе бидат достапни преку медиумскиот центар на институцијата.
