Две малолетни лица се здобиле со тешки телесни повреди, а една жена е повредена во сообраќајна несреќа што се случила на регионалниот пат Куманово–Липково, во близина на селото Никуштак.
Од СВР Куманово информираат дека несреќата била пријавена на 4 октомври околу 15:50 часот, откако патничко возило „пежо“ со кумановски регистарски ознаки излетало од коловозот и се превртело.
Со возилото управувала 33-годишната В.А. од Никуштак. Во несреќата биле повредени и двете малолетни сопатнички, кај кои во болница биле констатирани тешки телесни повреди.
Возачката, пак, била пренесена во Општата болница Куманово, каде што ѝ биле утврдени телесни повреди.
Увид на местото на несреќата извршила екипа од СВР Куманово, а надлежните продолжуваат со расчистување на околностите под кои се случила сообраќајката.
