Двајца малолетници на возраст од 15 и 13 години се лишени од слобода во Скопје поради сомнение дека се обиделе да ограбат 14-годишно момче.
Според информациите од Министерството за внатрешни работи, настанот се случил на 10 август околу 20 часот на булеварот „Кочо Рацин“ во Скопје.
Како што информира МВР, малолетниците физички го нападнале 14-годишното момче од Скопје и се обиделе да му одземат пари.
Откако не успеале во намерата, двајцата побегнале од местото на настанот.
Полициски службеници од СВР Скопје презеле мерки за нивно пронаоѓање, по што околу 20:40 часот ги лишиле од слобода на улицата „11 Октомври“ во општина Центар.
Двајцата малолетници биле спроведени и задржани во полициска станица.
Од МВР информираат дека по целосното документирање на случајот, против нив ќе биде поднесена соодветна пријава поради сомнение за сторено кривично дело „разбојништво“ во обид.
