Повеќето од македонските села се запустени. Снемуваат или веќе немаат население. Мора да се преземе нешто за да се смени тој неповолен тренд.
Проблемот е присутен и во Европа, но таму има и примери како се справуваат со тоа. Најнов е од Грција каде што за живеење на остров се нуди куќа, земјиште и по 500 евра месечно. Италија, пак, дава куќи за едно евро на доселеници во некои региони, а Шпанија нуди субвенции на млади за населување во запустени места.
Во Македонија, има околу 200 села со помалку од 100 жители, а многу од нив имаат само по неколку старци. Загрижувачко е што се празнат и помалите градови, оти сите што не се иселуваат во странство, сакаат да живеат во Скопје.
Македонија е земјоделска и сточарска земја, а оваа важна економска гранка не може да се развива во Скопје на бетонот.
Државата мора да има конкретен и сеопфатен план за заживување на селата. Клучно е да се обезбеди и квалитетна инфраструктура. Факт е дека во минатото, се нудеа различни субвенции, но за да успее во ова мора да се гледа како проект со функционален долгогодишен план, системска поддршка, а не само кампањски маркетинг мерки.