Рано утрово вистинска драма се одвивала над селото Бонче, каде што голем пожар со огромна брзина се движел по падината, загрозувајќи го селото. Огнените јазици достигнувале височина од три до четири метри, но благодарение на навремената реакција на доброволните пожарникари од Битола и Кочани, огнот бил спречен да се прошири кон куќите.
На терен бил директорот на Дирекцијата за заштита и спасување, Стојанче Ангелов, кој им се заблагодари на пожарникарите и посочи дека тие биле превентивно испратени во Бонче уште претходниот ден поради опасноста од ширење на пожарот.
„За малку ќе отидеше цело село, да не беа доброволните пожарникари“, изјави Ангелов.
Пожарникарите сведочат дека условите за гаснење биле исклучително тешки. Околу пет часот наутро огнот се движел со голема брзина по падината, потпомогнат од силен и непредвидлив ветер кој постојано го менувал правецот.
„На многу пожари сме учествувале, но ова што го видовме утрово беше нешто невидено. Пожарот одеше со огромна брзина, со пламен висок три до четири метри“, раскажа еден од пожарникарите.
Околу 20 доброволци од Битола и Кочани, заедно со жители од селото, со часови се бореле со огнената стихија. Тешкиот терен и густиот чад дополнително ја отежнувале интервенцијата.
„Имаше момент кога од чад не можев да видам каде одам, ниту каде е огнот“, сведочи пожарникар.
Голема помош во интервенцијата бил специјализираниот камион на ДПД Кочани, со погон на сите четири тркала, кој овозможил пристап до тешко достапните планински делови.
Пожарникарите од Кочани претходно биле ангажирани и кај прилепските гробишта, каде што исто така се соочиле со сериозен пожар. Според нивните сведоштва, таму пламените јазици достигнувале и до шест или седум метри. И покрај дефект на возилото, екипата успеала брзо да го оспособи и повторно да продолжи со гаснењето.
Ангелов порача дека развојот на доброволното пожарникарство ќе остане еден од приоритетите, посочувајќи дека доброволните пожарникари ова лето имале клучна улога во спречувањето на повеќе пожари.
„Денес го спасивте Бонче, пред неколку дена Крушевица, работевте и во Лопатица, а вчера и во Прилеп. Воодушевен сум од вашиот ангажман“, истакна Ангелов.
