Одлични вести пристигнуваат за навивачите на Пари Сен Жермен, откако Усман Дембеле и Ашраф Хакими го одработија целиот тренинг со тимот и се вратија во полн тренажен процес.
Францускиот шампион интензивно се подготвува за големото финале на Лигата на шампионите против Арсенал, кое ќе се одигра за четири дена во Будимпешта.
Усман Дембеле, кој во претходниот период имаше проблем со повреда на десниот лист по натпреварот против градскиот ривал Париз, сега е целосно вклучен во подготовките со екипата.
И покрај повредата, француските медиуми и претходно информираа дека неговиот настап во финалето не е доведен во прашање, а последните тренинзи тоа дополнително го потврдуваат.
Од друга страна, Ашраф Хакими имаше проблеми со мускулна повреда на десната нога, заработена во реваншот од полуфиналето против Баерн Минхен, поради што неговиот настап беше под знак прашалник.
Сепак, мароканскиот дефанзивец денес успешно ги издржа сите тренажни напори, што претставува големо олеснување за стручниот штаб на ПСЖ пред финалето со Арсенал.
Финалниот дуел од Лигата на шампионите ќе се игра на „Пушкаш Арена“ во Будимпешта, во сабота со почеток од 18 часот.
