Министерството за здравство соопшти дека лекот „Фостер“, кој се наоѓа на позитивната листа на лекови, наскоро повторно ќе биде достапен за пациентите без доплата.
Како што информираат од Министерството, компанијата што е носител на одобрението за ставање во промет на лекот ги известила дека во најскоро време ќе овозможи повторна достапност на „Фостер“ без дополнителен трошок за пациентите.
„Министерството за здравство и понатаму ќе спроведува активности со кои ќе се овозможи поголема достапност на лековите по поприфатливи цени за граѓаните“, наведуваат од ресорот.
Прашањето за цената на „Фостер“ предизвика силни реакции во јавноста откако лекот, кој го користат пациенти со астма и хронична опструктивна белодробна болест (ХОББ), поскапе од околу 300 на 1.081 денар.
Во меѓувреме, Министерството преговараше со производителот за намалување на доплатата, а на пациентите им беше посочено дека можат да користат и други лекови од позитивната листа без доплата.
Поскапувањето предизвика незадоволство кај голем број пациенти, кои истакнаа дека со години успешно ја користат истата терапија и не сакаат да преминат на друг лек. Реагираше и СДСМ, обвинувајќи дека пациентите се доведени во тешка положба поради зголемената цена и недостапноста на најавената бесплатна генеричка замена.
