Американскиот демократски сенатор Крис Марфи тврди дека администрацијата на претседателот Доналд Трамп нема јасен план за една од клучните точки во војната со Иран – Ормускиот теснец.
По затворен брифинг за конфликтот, Марфи изјави дека стратегијата на Белата куќа е нејасна и недовршена, особено кога станува збор за безбедноста на пловидбата низ овој стратешки премин.
Сенаторот Марфи на социјалната мрежа Икс објави дека присуствувал на двочасовен брифинг за војната, одржан зад затворени врати и посочи дека не може да открива доверливи информации, но дека јавноста има право да знае колку, според него, воените планови се недоволно разработени.
Според него, на брифингот било потврдено и дека промена на режимот во Техеран не е меѓу целите на операцијата.
„Тоа значи дека ќе се потрошат стотици милијарди долари од парите на даночните обврзници, ќе загинат многу Американци, а тврдокорниот режим – можеби уште порадикален и поантиамерикански – ќе остане на власт“, напиша Марфи.
Главната воена цел на операцијата, вели сенаторот, е уништување на иранските ракети, бродови и фабрики за дронови. Но, тој поставува прашање што ќе се случи кога бомбардирањето ќе престане, а Иран повторно ќе почне да ги обновува своите воени капацитети.
„Одговорот што го добивме сугерираше дека решението би било – уште бомбардирања. А тоа, се разбира, значи бескрајна војна“, предупреди Марфи.
Тој особено го критикуваше недостатокот на стратегија за Ормускиот теснец. „Што се однесува до Ормускиот теснец – тие немаат никаков план. Не можам да влегувам во детали како Иран може да го блокира преминот, но доволно е да се каже дека во моментов не знаат како повторно безбедно да го отворат“, напиша сенаторот.
5/ And on the Strait of Hormuz, they had NO PLAN. I can't go into more detail about how Iran gums up the Strait, but suffice it say, right now, they don't know how to get it safely back open.
Which is unforgiveable, because this part of the disaster was 100% foreseeable.
— Chris Murphy 🟧 (@ChrisMurphyCT) March 11, 2026
