И онака СДСМ има малку градоначалници, па сега како да почнува да се разидува и со тие што му останаа.
Последниот пример доаѓа од Крива Паланка, каде партијата преку соопштение го искара својот градоначалник Сашко Митовски да распише референдум за рудникот за антимон, а не да се договара со Мицкоски.
Партијата нагласува дека не е против инвестиции, но е против проекти што, според нив, можат да го загрозат здравјето на луѓето. Во соопштението се наведува дека експлоатацијата на антимон носи сериозни здравствени ризици – од респираторни заболувања до зголемен ризик од рак.
СДСМ предупредува дека ваквите проекти може да остават долгорочни последици врз животната средина и здравјето на населението, и затоа инсистира одлуката да биде на граѓаните.
Но, ваквиот пристап отвора прашање – зошто партијата јавно го прозива својот градоначалник, наместо ставовите да го усогласи внатре во своите редови?
Ова е сигнал дека во релацијата лидер – градоначалник можеби нешто не штима. Како што се виде дека не штима и во односот на Венко Филипче со центарскиот градоначалник Горан Герасимовски, кој уште вечерта по изборната победа славеше со својот тим, а не заедно со партиското раководство.