Дали сте суперширител на грип? Науката открива кој заразува најмногу

Сè повеќе научни истражувања покажуваат дека од формата на вашите бели дробови, преку начинот на кој зборувате, па сè до условите во просторот каде престојувате, може да зависи дали ќе бидете таканаречен „суперширител“ на вируси како грипот или ковид-19.

Научниците одамна знаат дека мал број луѓе се одговорни за голем дел од заразите. Според проценки, околу 20% од луѓето предизвикуваат 80% од преносите за време на епидемии. Истражувањата покажуваат и дека количината на вирус во телото драматично варира – некои заразени луѓе имаат и до 10 милиони пати повеќе вирусни честички од други.

Кога сте најзаразни?

Луѓето испуштаат најмногу заразни честички кога се најболни. Истражувања покажале дека при инфекција бројот на микроскопски честички што ги издишуваме драматично расте, а тие честички можат да носат стотици вируси секоја.

Особено опасни се малите аеросоли, кои подолго остануваат во воздухот и подлабоко навлегуваат во белите дробови на другите луѓе.

Како зборувате – има врска

Гласното зборување, пеењето и јасното изговарање на согласки како „т“, „к“ и „п“ создава повеќе честички. Истражувања покажуваат дека гласниот говор создава и до 50 пати повеќе аеросоли од тивкиот.

Телесни и биолошки фактори

Суперширителите почесто се:

– лица над 40 години
– мажи
– лица со прекумерна тежина
Причината може да биде побрзото и поплитко дишење, поголемата потреба од кислород и поголемото создавање честички при дишење и кашлање.

Исто така, слузта во дишните патишта игра улога – кај некои луѓе таа подобро го „заробува“ вирусот, кај други му дозволува полесно да се шири.
Просторот е клучен!
Дури и ако некој има биолошки карактеристики на суперширител, најголем ризик постои во:
затворени, слабо проветрени простории, групни тренинзи и фитнес сали, сув воздух (каде честичките подолго лебдат).
Заклучок
Суперширењето не зависи од еден фактор, туку од комбинација на биологија, однесување и средина. Научниците се надеваат дека во иднина ќе можат однапред да препознаат суперширители, за тие да преземат дополнителни мерки – како вакцинација и избегнување ризични ситуации.
До тогаш, експертите советуваат: внимавајте на гласни разговори, караоке-барови и затворени простори во сезоната на грип.