Во време кога светските пазари на нафта се тресат поради војната на Блискиот Исток, некои бензинските пумпи во Македонија вчера одлучија да „ги чистат резервоарите“ или имаа прекин на струјата па привремено да престанаа да точат бензин. На некои бензински можело да се точи само „до 1.000-ка“.
Граѓаните, кои реагираа на социјалните мрежи го поставуваа прашањето: Дали некои пумпаши ја чуваат нафтата купена по стара цена за да ја продаваат по повисока кога ќе поскапи.
Ситуацијата предизвика нервоза кај дел од возачите, особено откако на некои бензински станици се појавија ленти или ограничувања за точење гориво.
Владата, пак, уверува дека нема простор за паника и дека залихи на нафтени деривати има доволно. Премиерот Христијан Мицкоски по средба со претставници на нафтената индустрија изјави дека состојбата со горивата е под контрола и дека потребите на државата се целосно задоволени.
Во меѓувреме, институциите најавија и засилени инспекциски контроли на бензинските пумпи за да се провери дали некој намерно го ограничува точењето гориво. Министерството за финансии посочи дека нема потреба од создавање паника, но дека инспекторите ќе бидат на терен за да се утврди дали има неправилности.
Причината за сомнежите не е случајна. Секојпат кога се очекува поголем раст на цените на нафтата, се појавуваат сомневањата дека дел од трговците се обидуваат да ги зачуваат залихите купени по пониска цена. На тој начин, наместо веднаш да ги продаваат по старите цени, тие би можеле да остварат значително поголема заработка откако ќе се корегираат цените на пазарот.
Експерти предупредуваат дека ваквата практика, ако се покаже како вистинита, претставува класична шпекулација со стока во време на криза. Во услови кога граѓаните се соочуваат со неизвесност и можен раст на цените на горивата, ваквото однесување би значело директно профитирање од стравот и од кризата.
Од друга страна, трговците со нафта негираат дека има намерно задржување на горивото. Според нив, дел од прекините се навистина последица на технички процедури, логистика или зголемена побарувачка.
Но токму затоа државата најавува проверки. Доколку се утврди дека некоја бензинска пумпа намерно го ограничувала точењето гориво, може да се соочи со санкции.
Во меѓувреме, Македонија внимателно ја следи ситуацијата на глобалниот енергетски пазар. Владата веќе најави дека, доколку дојде до поголем раст на цените на нафтата, можно е да се интервенира со намалување на акцизите или други мерки за да се ублажи ударот врз граѓаните.