Венко Филипчe ги објави црвените линии на СДСМ околу евроинтеграцијата на Македонија. Опозиционерите бараат Владата од 15 до 25 ноември 2025 година да се изјасни дали останува на истиот текст или подготвува и предлага нов текст на уставните измени.
Во својата предлог резолуција СДСМ предлага Собранието да ја започне постапката за измена на Уставот и да се достигне до фазата на прво гласање најдоцна до 15 декември 2025 година, а финално изгласување и внесување на Бугарите во македонскиот устав да заврши најдоцна до 10 февруари 2026 година.
СДСМ нагласува дека Македонија е подготвена да ги исполни обврските од преговарачката рамка со ЕУ, вклучувајќи ги и уставните измени со јасна определба дека е тоа последната пречка, без прифаќање на нови барања или прашања од билатерален и идентитетски карактер.
Овој документ како работна верзија СДСМ најпрво ќе ја достави до сите политички партии, а потоа како што предлагаат Собранието треба да излезе со заеднички документ.
“Сметам дека е крајно неодговорно да не се прави ништо на ова поле. Ако ние постигнеме национален консензус никој нема да може да се бори со нас и да нѐ запре”, порача денеска Филипче.
