Уште еден пациент со лабораториски потврдена невроинвазивна форма на западнонилска треска почина на Универзитетската клиника за инфективни болести, со што бројот на жртви од оваа болест во Македонија се искачи на четири.
Директорот на Клиниката, Фадил Цана, информираше дека станува збор за 76-годишен пациент кој бил хоспитализиран 27 дена. И покрај лекувањето, поради тешката невроинвазивна форма на болеста и сериозните придружни заболувања, кај него настапил летален исход.
Во моментов на Клиниката се лекуваат 20 пациенти со западнонилска треска. Од нив, 18 случаи се лабораториски потврдени, додека двајца пациенти се водат како суспектни. На Одделот за интензивна нега се згрижени пет лица со тешка клиничка слика, кои се лекуваат согласно сите медицински протоколи.
Досега од Клиниката како излекувани се отпуштени 15 пациенти.
Цана соопшти дека кај 25-годишната пациентка, која претходно се водеше како суспектен случај, е потврдена невроинвазивна форма на западнонилската треска. Во текот на ноќта бил хоспитализиран и 24-годишен пациент од скопската општина Центар, за кого се очекуваат резултатите од лабораториските анализи.
Тој појасни дека сите пациенти кои развиле невроинвазивна форма на болеста задолжително се лекуваат во болнички услови.
„Според медицинските статистики, околу еден процент од заразените развиваат тешка невроинвазивна форма на болеста. Напредната возраст претставува независен ризик-фактор за потежок тек и можен смртен исход“, изјави директорот на Клиниката за инфективни болести.
