СВР Тетово поднесе кривична пријава против четири лица поради сомнение дека извршиле вкупно десет кривични дела – четири тешки кражби и шест обиди за тешка кражба.
Пријавени се Е.В. (43) од село Никуштак, Општина Липково, Х.А. (53) од Косово, како и А.А. (34) од село Отља и Е.А. (34) од село Никуштак.
Според истрагата, на 19 септември годинава од куќа во селото Долно Палчиште одзеле сеф во кој имало златен накит, оружје и муниција, при што причинетата штета е проценета на околу 160.000 евра.
Во уште еден случај, извршен кон крајот на ноември минатата година, од куќа во истото село биле украдени златен накит и пари во вредност од околу 70.000 евра.
Полицијата ги сомничи и дека во мај годинава провалиле во спортска обложувалница во Теарце, каде со употреба на сила отвориле сеф и одзеле пари, како и дека од магацин на бензинска станица во Пирок украле повеќе пакувања цигари.
Истрагата покажала дека од април до септември годинава осомничените во уште шест наврати провалиле во куќи и други објекти во селата Камењане, Долно Палчиште, Нераште, Теарце и Радиовце, но по извршеното пребарување не одзеле предмети.
Против четворицата е поднесена соодветна кривична пријава, а истрагата продолжува.
