Четири лица го загубија животот во тешка сообраќајна несреќа што синоќа се случила на скопската обиколница, во близина на Радишани. Според првичните информации, околу половина час пред полноќ дошло до директен судир меѓу патничко возило „БМВ“ и товарно возило, по што автомобилот се запалил и целосно изгорел.
Поради сериозноста на несреќата, сообраќајот на делницата Велес – Тетово бил пренасочен преку клучките Мирковци и Приштина. Обиколницата останала затворена речиси шест часа, а сообраќајот бил нормализиран утринава околу 5:30 часот.
На местото на трагедијата интервенирале полициски екипи, пожарникари и Итната медицинска помош, додека истражните органи во текот на ноќта вршеле увид за утврдување на причините за несреќата.
Засега од Министерството за внатрешни работи нема официјални информации за идентитетот на загинатите лица.
Според дел од медиумските информации, се разгледува можноста камионот со косовски регистарски ознаки да навлегол во спротивната сообраќајна лента. Сепак, надлежните институции сè уште не ја потврдиле причината за несреќата и не е познато дали станува збор за човечка грешка, здравствен проблем кај возачот или друг фактор.
Во истрагата е вклучен и јавен обвинител, кој заедно со останатите надлежни служби ги анализира трагите од ударот и другите докази пронајдени на местото на несреќата.
