Состојбата во Гостивар по кризата со водоснабдувањето постепено се стабилизира, а во моментов нема нови хоспитализации на лица со стомачни тегоби, информираше министерот за здравство Сашо Клековски.
Тој најави дека сите резултати од анализите за исправноста на водата ќе бидат јавно објавени, но упати апел до граѓаните да продолжат внимателно да ги почитуваат препораките сè додека не завршат сите интервенции во водоводниот систем.
„Од понеделникот анализите покажуваат четири чисти и пет загадени локации. Иако бројот на заболени се намалува, мерките мора строго да се почитуваат“, изјави Клековски.
Според него, досегашните анализи покажале присуство на астровирус и бактеријата шигела кај дел од примероците, но резултатите не се целосно идентични, поради што засега не може да се утврди еден единствен причинител за појавата на здравствените проблеми.
Министерот нагласи дека граѓаните треба да се информираат само преку официјалните институционални канали, за да се избегне ширење различни и неточни информации. Тој посочи дека Министерството за здравство ги следи препораките на Комисијата за заразни болести, додека контролата на квалитетот и исправноста на водата е во надлежност на Агенцијата за храна и ветеринарство.
Клековски информираше дека веќе се пристигнати дел од анализите направени од Центарот за јавно здравје – Тетово, а се очекува и извештајот од Институтот за јавно здравје. По добивањето на сите резултати ќе биде направена споредба на примероците земени од различни контролни точки и целокупните податоци ќе бидат објавени.
„Не е точно дека сите наоди се позитивни. Има и негативни резултати, но мора да се утврди на кои точки се однесуваат. Ништо нема да биде сокриено, сè ќе биде целосно транспарентно“, порача министерот.
Тој додаде дека паралелно се вршат анализи и на Клиниката за инфективни болести, со примена на различни методи за поголема точност на резултатите.
Според досегашните сознанија, станува збор за комбинација од бактериско, односно фекално загадување и вирусно загадување, кое можно е да е поврзано и со атмосферски води.
Клековски посочи дека засега не може да каже точен рок кога водата во Гостивар повторно ќе биде безбедна за пиење, бидејќи санацијата на водоводниот систем е во надлежност на други институции.
„Епидемијата постепено се смирува. Следува детална анализа за да се утврди што точно се случило, каде имало пропусти и како да се спречи ваква состојба во иднина. Одговорност мора да има, но најважно е да извлечеме поуки и да го подобриме системот“, истакна министерот.
