Средбата меѓу рускиот претседател Владимир Путин и унгарскиот премиер Виктор Орбан во Кремљ во Москва заврши по речиси четири часа разговори, објави агенцијата РИА Новости.
Путин и Орбан разговараа за ситуацијата во Украина и билатералните односи на средбата во Москва денес.
Путин рече дека американскиот претседател Доналд Трамп предложил одржување разговори меѓу Русија и САД во Унгарија, објавија руските медиуми.
„Тој веднаш рече: „Имаме добри односи со Унгарија – вие имате добри односи со Виктор, а и јас ги имам – еве, ја предлагам оваа опција“. Секако, со задоволство би се согласиле“, рече рускиот претседател.
Путин истакна дека со задоволство би одржал средба во Будимпешта доколку страните се согласат за тоа, додавајќи дека Москва е свесна за избалансираната позиција на Унгарија во врска со Украина.
„Ви благодарам што толку брзо одговоривте на можноста за средба меѓу мене и претседателот на Соединетите Американски Држави во вашата земја“, рече Путин.
Орбан, од своја страна, рече дека е подготвен да обезбеди платформа за преговори.
„Се надеваме дека неодамна објавените мировни иницијативи на крајот ќе доведат до токму овој мир“, рече тој.
Путин нагласи дека односите меѓу Москва и Будимпешта се засноваат на прагматичен пристап, дека двете земји соработуваат во енергетскиот сектор и дека трговскиот промет е зголемен за седум проценти оваа година.
„Многу ми е драго што можам да забележам дека, и покрај сите тешкотии денес, нашите односи остануваат недопрени и продолжуваат да се развиваат“, рече тој.
Орбан објасни дека Унгарија ја цени стабилноста на снабдувањето со енергија од Русија и е заинтересирана за дијалог по ова прашање.
„Ова е 14-ти пат како се среќавам со вас. Мислам дека, со оглед на сегашниот историски момент, навистина направивме многу за да ја развиеме соработката меѓу нашите народи. И искрено се надевам дека ќе направиме многу повеќе“, рече унгарскиот премиер.
Будимпешта не подлегна на надворешниот притисок и продолжува да ги развива односите со Москва, додаде тој.
На состанокот присуствуваа и рускиот министер за надворешни работи Сергеј Лавров, помошникот на рускиот претседател Јуриј Ушаков и рускиот вицепремиер Александар Новак, објави РИА Новости.
Пред да замине за Москва, Орбан рече дека сака да продолжи да увезува нафта и гас во Унгарија и нагласи дека рускиот извоз ѝ обезбедил на земјата најниски цени на енергијата во Европа.
