Царински службеници на граничниот премин Богородица, во соработка со полициски службеници, спречија обид за нелегален внес на повеќе егзотични влекачи во државата.
При контрола на возило управувано од косовски државјанин биле пронајдени седум змии и еден гуштер, кои биле скриени под седиштето, спакувани во кутии и завиткани во марами.
Според Царинската управа, најголем дел од запленетите животни припаѓаат на заштитени видови. Меѓу нив има два питони од видот „Carpet Spilota“, по еден питон од видовите „Short Tailed“ и „Brandy Carpet“, како и змии од видовите „Chinese Ring Rat“, „Reticulated Super Dwarf“ и отровната „Baron Snake“.
Запленетите влекачи ќе бидат предадени на надлежните институции, додека против лицето е поведена соодветна постапка поради обид за недозволен внес.
Од Царинската управа потсетуваат дека трговијата и транспортот на заштитени видови се строго регулирани со Конвенцијата за меѓународна трговија со загрозени видови на дива флора и фауна (CITES), а внесување без соодветни дозволи претставува прекршување на законските прописи.
