Кристијано Роналдо ја напушти базата на португалската репрезентација, а неговата одлука предизвика нови реакции откако се огласи и неговата сестра Елма Авеиро со жестока порака до јавноста.
Роналдо претходно потврди дека заминал од репрезентативниот камп по разговорот со селекторот и претседателот на Португалската фудбалска федерација.
„По прес-конференцијата на селекторот на репрезентацијата и по разговорот со претседателот на Португалската фудбалска федерација, решив да го напуштам кампот на репрезентацијата. Кога ќе дојде време, ќе им ја кажам на Португалците вистината за причините што доведоа до моето заминување од репрезентацијата, на која отсекогаш сум бил посветен. Сега е време да им посакам среќа на Португалија и на сите мои соиграчи“, напиша Роналдо.
По ова, неговата сестра Елма Авеиро се огласи со критика кон начинот на кој јавноста се однесува кон најголемата португалска фудбалска ѕвезда.
„Кристијано заслужуваше повеќе почит, а националниот тим мора да има подобра организација. Португалското новинарство треба повеќе да се потпира на проверени информации, а помалку на претпоставки“, порача таа.
Во објавата таа упати и остри зборови кон дел од јавноста, наведувајќи дека Португалците не ја ценат доволно големината на она што Роналдо го направил за репрезентацијата.
„Заслужуваме да се вратиме на просечноста каде што бевме пред да се појави Кристијано. Ти благодариме КР7, заслужи повеќе“, напиша Елма Авеиро.
Нејзината порака дополнително ги засили шпекулациите дека ова може да биде најава за крај на репрезентативната кариера на Роналдо, иако самиот фудбалер засега не потврди таква одлука.
