Бугарската нуклеарна електрана „Козлодуј“ ќе ја намали моќноста на еден од своите реактори поради историски ниското ниво на Дунав предизвикано од долготрајната суша. Ова е првпат во 52-годишната историја на електраната екстремните временски услови да доведат до намалување на производството.
Бугарското Министерство за енергетика соопшти дека денеска превентивно ќе биде намалена моќноста на петтиот блок за околу 120 мегавати, од неговиот капацитет од нешто повеќе од 1.000 мегавати. Причината е очекувањето дека водостојот на Дунав во бугарскиот дел од реката дополнително ќе опаѓа.
„Козлодуј“ ја користи водата од Дунав за ладење на пареата во кондензаторите во ненуклеарниот дел од електраната, додека речната вода не се користи директно за ладење на реакторите. Во електраната уште во јуни беше формирана кризна работна група поради падот на водостојот и прогнозите за продолжување на сушата во западна и централна Европа.
Проблеми поради ниското ниво на Дунав веќе имаат и други нуклеарни централи во регионот, при што унгарската „Пакш“ претходно ја намали производството. Во Романија, пак, кон крајот на јули беше исклучен првиот блок на нуклеарната електрана „Чернавода“, а енергетскиот сектор во земјата во август беше ставен во состојба на висока подготвеност.
