СДСМ деновиве пукаше од сите оружја против Владата – прес-конференции, соопштенија, настапи, анализи… сè во функција на една теза: нема напредок на реформите. Се повикуваа на изјава на европратеникот и известувач за Македонија, Томас Вајц, а лидерот Венко Филипче дури тврдеше дека тоа е потврда за она што со месеци го зборувале.
Но, наместо политички поени – добија студен туш. Интервјуто на Вајц за бугарска телевизија се покажа како старо, дадено пред неколку месеци, а контекстот во меѓувреме – променет. Дури и Вајц вчера даде изјава во која потврди дека ситуацијата оттогаш е сменета и во Македонија има напредок во реформите, како што констатираше и во неговиот годишен извештај.
Бугарите уште еднаш ги насамарија и им наметнаа игра на сопартијците на Филипче, а СДСМ повторно влезе во замка. Истото сценарио се виде и при договорот за добрососедство, но и при прифаќањето на преговарачката рамка за ЕУ во која беа вклучени и услови од Софија.
Прашањето е сега: Има ли во СДСМ луѓе што навистина ги проверуваат информациите пред да излезат во јавност? Или целта е само да се „штанцаат“ по неколку соопштенија дневно, без анализа и без стратегија?
Ова не е првпат опозицијата да реагира импулсивно на тема што доаѓа однадвор, а потоа да се покаже дека реалноста е поинаква. Наместо промислена политика, јавноста гледа брзи, нервозни реакции – повеќе за дневна употреба, отколку за суштинска дебата.
И на крајот, наместо да ја засили својата позиција, СДСМ уште еднаш си нанесе штета. А Бугарија повторно ја наметна агендата во момент што ѝ одговара, оставајќи ја македонската опозиција да реагира без целосна слика – и без политичка тежина.
