Британска туристка завршила во болница откако била касната од инвазивна риба-пуфер додека се капела во морето кај Каламаки на грчкиот остров Закинтос.
Жената побарала медицинска помош во приватна клиника, каде што ѝ била укажана прва помош за повредата. Случајот е пријавен и се истражува од страна на надлежните служби, а според првичните информации, нападот го предизвикала риба-пуфер со сребрени образи, позната и како зајачка риба.
Овој вид во последните години сè почесто се појавува во Средоземното Море, а експертите го поврзуваат неговото ширење со климатските промени и зголемувањето на температурата на водата.
Грчкиот Црвен крст упати предупредување за опасностите од оваа риба, која има исклучително силни заби способни да оштетат коска, дрво, па дури и метал. Дополнителен ризик претставува и присуството на отровниот невротоксин тетродотоксин во нејзините органи и месо.
Рибарите од грчкото крајбрежје предупредуваат дека инвазивниот вид не претставува опасност само за капачите, туку и за морскиот екосистем и нивната работа.
„Ако ве касне една од овие риби, може едноставно да ви отсече прст. Го уништуваат морето и не оставаат ништо зад себе“, изјави рибарот Алексис Каралампакис.
Тие велат дека рибите ги оштетуваат рибарските мрежи и предизвикуваат големи финансиски загуби.
„Ми требаа два дена да ги поправам мрежите. Ги извадив повторно и имаше уште 20 дупки. Секоја година ситуацијата станува полоша“, вели рибарот Костис Зевелекакис.
Грчките власти веќе преземаат мерки за заштита на капачите, вклучително и поставување заштитни бариери во одредени морски подрачја. Научниците предупредуваат дека ширењето на овој инвазивен вид станува сериозен еколошки и безбедносен проблем за регионот.
