Франција се соочува со голем бран средношколски протести кои се проширија низ земјата, при што најмалку 119 лица се повредени, а стотици се приведени. Незадоволството на учениците започна минатата недела поради недостиг на наставници, лошата состојба на училишните објекти и проблемите во образовниот систем, а дополнително се засили откако се приклучија кон протестите на јавниот сектор.
Во повеќе градови беа организирани блокади пред средните училишта. Во Сен Дени, северно од Париз, учениците ги блокираа влезовите во училиштата, додека полицијата беше распоредена за да ја контролира ситуацијата. Слични инциденти беа регистрирани и во Лион и Лил, каде дел од демонстрантите фрлале предмети кон полициските сили.
Полицијата одговори со низа интервенции и приведувања, а најголем дел од уапсените се малолетници и млади лица.
Францускиот министер за образование Едуар Жефре изјави дека меѓу повредените има и ученици и вработени во училиштата. Најголем дел од повредениот наставен кадар се директори и професори кои биле на влезовите во објектите за време на блокадите.
Протестите создадоа дополнителен политички притисок врз владата, особено откако поддршка за учениците дадоа претставници од крајната левица. Незадоволството се појавува во период кога владата се подготвува да го претстави буџетот за 2027 година, кој предвидува нови мерки за намалување на јавните расходи.
Според податоците на Организацијата за економска соработка и развој (ОЕЦД), иако Франција во периодот од 2015 до 2022 година ги зголемила средствата за образование, учеството на овој сектор во вкупниот државен буџет постепено се намалува.
Средношколците бараат подобри услови за образование, повеќе наставен кадар и инвестиции во училиштата, додека властите се соочуваат со предизвикот да го смират незадоволството без дополнително зголемување на политичките тензии.
