Белгија повторно не успеа да стигне до победа на Светското првенство, откако во натпреварот од второто коло одигра 0-0 против Иран и остана без триумф по две одиграни средби.
На стадионот во Инглвуд беа создадени неколку добри можности на двете страни, но главните улоги им припаднаа на голманите. Особено се истакна иранскиот чувар на мрежата Алиреза Беинраванд, кој со седум успешни интервенции беше најзаслужен што неговата репрезентација освои бод.
Белгија првата сериозна шанса ја имаше преку Максим Де Кујпер, но Беинраванд беше сигурен. Иран возврати со обиди на Хосеин Канани и Мехди Тареми, кој во 25. минута ја испрати топката во мрежата, но погодокот беше поништен поради офсајд по ВАР-проверката.
Во второто полувреме Тареми повторно се закани, но Тибо Куртоа одлично реагираше. Најголемата можност за Белгија ја пропушти Де Кујпер, кој од непосредна близина не успеа да го совлада расположениот ирански голман по одличното додавање на Кевин Де Брујне.
Белгијците останаа со играч помалку во завршницата, кога Натан Нгој доби директен црвен картон по прекршок врз Тареми во ситуација кога напаѓачот излегуваше сам пред голот.
Со бројчена предност, Иран тргна по победа, а најблиску беше Саид Езатолахи, но не успеа да ја затресе мрежата. Во финишот Белгија се обиде преку Доди Лукебакио и Брендон Мехеле, но резултатот остана непроменет.
По две кола, Иран и Белгија имаат по два освоени бода. Во последната рунда Белгија ќе се соочи со Нов Зеланд, додека Иран ќе игра против Египет во битката за место во нокаут-фазата.
