Репрезентацијата на Босна денеска одржа официјална прес-конференција пред утрешниот дуел со Македонија, кој ќе се одигра во Сараево на стадионот „Кошево“, со почеток во 20:30 часот.
Селекторот Сергеј Барбарез упати пофални зборови за македонската репрезентација, оценувајќи ја како сериозен и квалитетен противник кој ќе настапи со јасна цел да одигра добар натпревар.
„Мора да се пристапи сериозно. Не треба да се гледа ранкингот на ниту една репрезентација. Не сакам да омаловажувам никого, затоа што не сакам ниту нас некој да нè омаловажува. Македонија е сериозен противник, има нов селектор и за нив ова е важен натпревар. Тие ќе сакаат да победат исто како и ние“, изјави Барбарез.
Во редовите на босанската репрезентација нема поголеми проблеми со повреди. Во тренажен процес се враќаат Табаковиќ и Шуњиќ, додека Един Џеко добил одмор од претпазливост.
