Мал спортски авион се урнал во Мавровското Езеро, информира Центарот за управување со кризи. Во леталото се наоѓале две лица, од кои едното е повредено, но засега нема официјални информации за тежината на повредите.
Инцидентот бил пријавен преку единствениот број за итни случаи 112, по што ЦУК веднаш ја проследил информацијата до СВР Тетово, Итната медицинска помош и Регионалниот центар за управување со кризи во Тетово, со цел брза интервенција на терен.
Директорот на ЦУК, Мухамед Али, изјави дека сите надлежни служби биле навремено известени и излегле на местото на настанот, но дека во овој момент не се соопштуваат дополнителни детали.
Во меѓувреме, Комитетот за истрага на воздухопловни несреќи и сериозни инциденти започнал постапка за утврдување на причините за падот на малиот авион во езерото. Надлежните институции работат на расветлување на околностите под кои дошло до несреќата.
