Екипата на Атлетико Мадрид направи голем чекор кон финалето на Кралски куп на Шпанија, откако на домашен терен убедливо ја совлада Барселона со 4:0 во првиот полуфинален натпревар.
Натпреварот практично беше решен уште во првото полувреме, кога домаќините постигнаа четири гола и целосно ја презедоа контролата на теренот. Резултатот беше отворен во 6. минута со автогол на Ерик Гарсија, а само осум минути подоцна Антоан Гризман зголеми на 2:0.
Домашниот тим продолжи со офанзивната игра, па новото засилување Адемола Лукман во 33. минута го постигна третиот погодок. Во судиското продолжение од првиот дел, Хулијан Алварез ги постави конечните 4:0, за убедлива предност пред реваншот.
Вториот натпревар меѓу Атлетико и Барселона е закажан за 3 март, кога каталонскиот клуб ќе се обиде да направи тежок пресврт.
Во второто полуфинале, Реал Сосиедад како гостин го совлада Атлетик Билбао со 1:0, обезбедувајќи минимална предност пред реваншот кој ќе се игра на 4 март.
Финалето на натпреварувањето е закажано за 18 април.
