Американската амбасада во Приштина издаде безбедносно предупредување поради најавените масовни протести што ќе се одржат во среда, 16 септември, во центарот на Приштина и во повеќе градови низ Косово.
Протестите се организираат во пресрет на изрекувањето на пресудите на Специјализираните совети во Хаг против четворица поранешни команданти на поранешната ОВК – Хашим Тачи, Кадри Весели, Јакуп Красниќи и Реџеп Селими, кои се обвинети за воени злосторства и злосторства против човештвото.
Од Амбасадата предупредуваат дека се очекуваат големи собири, затворање на улици и сериозни нарушувања на сообраќајот.
На американските државјани им се препорачува да го ограничат движењето, да избегнуваат области каде што ќе се одржуваат протестите и, доколку е можно, да не патуваат до работните места или училиштата ако нивните вообичаени маршрути минуваат низ тие локации.
Исто така, на персоналот на Владата на САД му е препорачано да избегнува патувања што не се неопходни во близина на протестите, а на вработените им е советувано да не ги испраќаат своите деца на училиште поради очекуваните сообраќајни блокади.
Американската амбасада во Приштина ќе продолжи со работа, но конзуларните услуги ќе се обезбедуваат во ограничен обем и според потребите.
Во предупредувањето се апелира граѓаните да бидат внимателни, да ги избегнуваат местата каде што ќе се одржуваат демонстрации и да ја следат состојбата на терен.
Според обвинителството во Хаг, за Тачи, Весели, Красниќи и Селими се бараат казни од по 45 години затвор. Тие се обвинети за воени злосторства и злосторства против човештвото извршени во периодот 1998–1999 година, вклучувајќи убиства, киднапирања и прогон на припадници на тогашната југословенска војска и полиција, српски цивили, други неалбанци, како и Албанци кои не ја поддржувале ОВК.
Во пресрет на објавувањето на пресудите, политичките тензии во Косово дополнително се засилуваат, а властите очекуваат зголемен број демонстранти на улиците.
