Американската амбасада во Белград денеска издаде предупредување за граѓаните на САД во врска со најавените демонстрации што треба да се одржат во сабота во главниот град на Србија.
Во соопштението објавено на мрежата X, амбасадата наведува дека организаторите најавиле повеќе протести на 23 мај 2026 година, а полицијата очекува големи маси луѓе, затворање на улици и сообраќаен метеж во поширокото централно подрачје.
Според најавите, маршевите ќе започнат од повеќе локации во Белград и Земун, а завршниот собир ќе се одржи на плоштадот Славија, каде што главниот дел од протестот е закажан за 18:00 часот.
Амбасадата предупредува дека, во зависност од бројот на учесници, може да дојде до привремено затворање на мостовите и неколкучасовни ограничувања во сообраќајот пред и по настанот.
На граѓаните на САД им се препорачува да ги следат локалните медиуми, да ги избегнуваат поголемите групи и да бидат внимателни, а во случај на потреба да контактираат со Амбасадата во Белград.
