Министерот за здравство Азир Алиу учествува на дванаесеттиот состанок на високо ниво на Иницијативата за мали земји на Светска здравствена организација – Регион за Европа, кој се одржува во Рига.
Дводневниот состанок е посветен на едно од клучните прашања за здравствените системи во Европа – како малите земји, со ограничени ресурси, миграција на здравствениот кадар, стареење на населението и зголемени потреби на пациентите, можат да развијат одржливи и иновативни решенија за здравствената работна сила.
Во своето обраќање, министерот Алиу истакна дека малите земји можат да немаат најголеми ресурси, но имаат потенцијал за брза адаптација, добра координација и силна политичка волја за промени.
Тој нагласи дека целта е да се изгради здравствен систем кој подобро го користи знаењето на здравствените работници, го намалува административниот товар и им овозможува повеќе време за пациентите.
На сесијата посветена на оптимизација на здравствената работна сила, министерот ја претстави Националната стратегија за дигитално здравство за периодот две илјади дваесет и шест – две илјади и триесет, како еден од клучните реформски процеси во државата.
Алиу посочи дека дигитализацијата не претставува само техничка модернизација, туку начин за подобро организирање на здравствениот систем, поврзување на нивоата на здравствена заштита и олеснување на работата на здравствените работници преку намалување на административните пречки и подобар пристап до податоци.
Тој додаде дека дигиталното здравство е инструмент за подобра грижа кон пациентите, при што кога податоците го следат пациентот, лекарите добиваат поцелосна слика, пациентите побрза и побезбедна услуга, а системот станува поорганизиран и поодговорен.
Во таа насока, министерот ги претстави следните чекори: дигитализирани патеки на лекување, приоритетно упатување и тријажа, развој на мултидисциплинарни тимови што ги поврзуваат примарната, секундарната и терциерната здравствена заштита, како и пилот-проект за теледерматологија со цел доближување на специјалистичките услуги до пациентите во руралните и оддалечените средини.
Тој се осврна и на новиот закон за евиденции во здравството, како дел од усогласувањето со Европскиот простор за здравствени податоци, како и на унапредувањето на националниот регистар на здравствени работници.
