Албанија од новата учебна 2026/2027 година воведува нови и построги правила во основните и средните училишта, со цел зголемување на безбедноста, дисциплината и подобрување на училишната средина.
Учебната година во Албанија започнува на 14 септември, а учениците уште од првиот ден ќе бидат запознаени со новите правила кои ќе мора доследно да ги почитуваат.
Меѓу најзначајните измени се забраната за користење мобилни телефони за време на наставата, како и забраната за внесување и консумирање нездрава храна во училиштата.
Во секое одделение ќе се презентираат безбедносните протоколи, правилата за облекување, принципите на меѓусебно почитување и соживот, како и однесувањето кое се очекува од учениците во рамки на училишната заедница.
Во спроведувањето на новите мерки ќе бидат вклучени наставниците, психосоцијалните служби, училишното обезбедување и останатиот персонал, со цел правилата да бидат јасно разбрани и применувани во пракса.
Дополнително, ќе биде воведен систем за проценка и управување со ризици во училиштата. Локалните образовни канцеларии ќе назначуваат координатори за ризик, а училиштата ќе се категоризираат според степенот на безбедносен ризик.
Во дел од училиштата веќе се поставени безбедносни камери, а проценката на ризиците ќе се врши преку анкети, собирање податоци и физички проверки на објектите.
Директорите ќе имаат обврска да преземаат конкретни мерки за намалување на ризиците и да соработуваат со локалните власти, полицијата и здравствените институции.
Како еден од главните приоритети за новата учебна година е посочена и борбата против насилството, врсничкото малтретирање и насилниот екстремизам, со поголема вклученост на училиштата, родителите и локалната заедница.
