Изградбата на експресниот пат што треба да ги поврзе Кочани, Виница и Делчево, со клучка кон Македонска Каменица, се очекува да започне кон крајот на летото или на почетокот на есента 2027 година, најави премиерот Христијан Мицкоски при денешната посета на Делчево.
Мицкоски информираше дека по спроведената јавна расправа е избрана една од двете разгледувани траси, а во тек се подготовките на потребната документација за реализација на проектот.
„Станува збор за експресен пат кој ќе ги поврзе Кочани, Виница и Делчево, со клучка за Македонска Каменица. На јавната расправа беа разгледани две варијанти, од кои едната е избрана. Во тек е изработката на студија за изводливост и еколошка студија, а веќе разговараме и со потенцијални финансиски институции“, изјави премиерот.
Тој посочи дека проектот бил претставен пред Европската инвестициска банка и Европската банка за обнова и развој, а апликацијата за обезбедување финансиска поддршка веќе е поднесена.
Според најавите, доколку активностите се одвиваат според планираното, студиите и концептите за избраната варијанта треба да бидат завршени напролет.
„Очекувам камен-темелникот да биде поставен кон крајот на летото или почетокот на есента во 2027 година. Со тоа ќе се заокружи една целина која значително ќе ја подобри поврзаноста на жителите од овој дел на Македонија со останатите региони“, рече Мицкоски.
Премиерот најави и други инфраструктурни активности во Источниот регион. Од понеделник, според него, треба да започне реконструкцијата на патниот правец од Делчево до граничниот премин со Бугарија.
Тој информираше и дека е завршена тендерската постапка за санација на мостот на излезот од Делчево кон Македонска Каменица и Кочани, со што се очекува наскоро да започнат градежните работи.
За време на посетата на Делчево, Мицкоски заедно со министерот за здравство Сашо Клековски и министерот за спорт Борко Ристовски изврши увид во градежните активности на Здравствениот дом „Гоце Делчев“, како и во почетокот на реконструкцијата на градската спортска сала.
