Градоначалникот на Скопје, Орце Ѓорѓиевски, изврши увид во работите за обнова на жичарата на Водно, најавувајќи дека таа повторно ќе биде ставена во функција веќе следниот месец, по завршувањето на реконструкцијата и сите безбедносни проверки.
Ѓорѓиевски истакна дека при увидот биле утврдени сериозни недостатоци, кои, според него, се резултат на долгогодишно неспроведување на неопходните големи сервиси и редовно одржување.
„Жичарата е едно од омилените скопски доживувања. Но, беа констатирани сериозни недостатоци, последица на долгогодишното неспроведување на неопходните големи сервиси и редовното одржување од страна на претходните раководства. Беше потребен обемен и темелен зафат, занемаруван речиси една деценија. Затоа жичарата беше ставена вон функција. За мене, безбедноста на нашиот народ е пред сѐ. Тука нема компромис“, изјави градоначалникот.
Тој информираше дека во моментов се изведуваат работи за целосна обнова на жичарата и реконструкција на кабините, додека моторот е испратен на репарирање надвор од државата.
Според најавите, по завршувањето на сите активности и задолжителните технички и безбедносни проверки, жичарата повторно ќе биде достапна за скопјани и посетителите на главниот град.
„Го обновуваме она што со години било запоставувано. Со одговорност, со работа и со дела. Го враќаме сјајот на Скопје“, порача Ѓорѓиевски.
