Министерот за надворешни работи и надворешна трговија Тимчо Муцунски утре ќе престојува во работна посета на Литванија, каде што ќе присуствува на отворањето на новата македонска амбасада во Вилнус.
Од Министерството за надворешни работи и надворешна трговија соопштија дека свеченото отворање на амбасадата претставува значаен чекор во зајакнувањето на дипломатското присуство на Македонија и во продлабочувањето на билатералните односи со Литванија, како и со земјите од Балтичкиот регион.
Во рамки на посетата, Муцунски ќе оствари билатерална средба со литванскиот министер за надворешни работи Кештудис Будрис. На средбата ќе се разговара за унапредување на политичкиот дијалог, интензивирање на економската соработка и поддршката за македонските евроинтегративни процеси.
Предвидено е двајцата министри да разменат мислења и за актуелните безбедносни предизвици, како и за соработката во рамките на евроатлантското сојузништво.
Од МНРиНТ оценуваат дека посетата се реализира во важен период, непосредно пред Литванија да го преземе претседавањето со Советот на Европската Унија во првата половина на 2027 година, кога политиката на проширување ќе биде меѓу клучните теми на европската агенда.
