ВМРО-ДПМНЕ побара поранешниот претседател Стево Пендаровски јавно да се произнесе за неговата поврзаност со објект во скопската населба Влае, за кој, како што наведуваат од партијата, самиот кажал дека е во сопственост на неговиот близок соработник Еролд Муслиу.
Од владејачката партија поставија прашања поврзани со потеклото на средствата вложени во изградбата, имотната состојба на Муслиу и евентуален судир на интереси.
ВМРО-ДПМНЕ прашува дали пријавените приходи и имотната состојба на Муслиу соодветствуваат со вредноста на инвестицијата, дали се пријавени сите негови деловни интереси и дали постојат недозволени поврзаности од периодот кога извршувал јавна функција.
Од партијата побараа и Муслиу да даде објаснување за потеклото на средствата со кои се финансира изградбата, а надлежните институции да извршат проверки на документацијата, начинот на финансирање и законитоста на инвестицијата.
Според ВМРО-ДПМНЕ, Јавното обвинителство и Државната комисија за спречување на корупцијата треба да го разгледаат случајот и да утврдат дали постојат елементи на судир на интереси или поврзаност со претходното службено работење на Муслиу.
„Граѓаните имаат право да знаат дали луѓето кои извршувале високи јавни функции можат да го оправдаат своето богатство со законски стекнати приходи. Нема недопирливи. Нема привилегирани. Законите мора да важат подеднакво за сите“, наведуваат од ВМРО-ДПМНЕ.
