Децата помлади од 15 години во Грција од 1 јануари 2027 година нема да можат да користат социјални мрежи, откако грчкиот парламент го усвои новото законско решение со кое се воведуваат построги правила за заштита на малолетниците во дигиталниот простор.
Според законот, технолошките компании ќе мора да воспостават системи за проверка на возраста на корисниците, но притоа ќе бидат обврзани да ја почитуваат приватноста и да избегнуваат непотребно собирање лични податоци.
Грчкиот премиер Кирјакос Мицотакис изјави дека платформите имаат рок од околу два и пол месеци да подготват механизми со кои ќе се обезбеди спроведување на новите правила, пренесува грчката државна телевизија ЕРТ.
Со законот не е предвидена задолжителна употреба на конкретна апликација или систем за идентификација. Компаниите сами ќе треба да изберат технологија со која ќе можат сигурно да утврдат дали корисникот ја исполнува минималната возраст, без загрозување на личните податоци.
Грчките власти велат дека главната цел на мерката е намалување на негативното влијание од прекумерното користење на социјалните мрежи кај децата. Меѓу проблемите што ги посочуваат се нарушеното спиење, намалената концентрација и помалото време поминато во директна комуникација со врсниците.
Владата очекува новите правила да им помогнат и на родителите во справувањето со феноменот познат како „бесконечно скролање“ – навика за постојано прелистување содржини на мобилните уреди, која сè повеќе влијае врз секојдневието на младите.
Грција е меѓу седумте земји членки на Европската Унија кои, заедно со Европската комисија, работат на развој на заеднички механизам за проверка на возраста на интернет.
Слични мерки веќе се применуваат или се разгледуваат во други држави. Австралија минатата година стана првата земја што воведе законски ограничувања за пристапот на малолетници до социјалните мрежи, додека во Франција слично решение беше поништено од Уставниот совет.
Со новите правила, Грција најавува поголема одговорност за дигиталните платформи и дополнителна заштита на децата од ризиците што ги носи користењето на интернет.
