Скопје денеска ќе биде домаќин на најмасовното издание на Виз Ер Скопскиот маратон досега. На 22. издание на оваа спортска манифестација ќе настапат рекордни 15.050 тркачи од 63 земји, меѓу кои и голем број елитни атлетичари кои ќе се натпреваруваат за највисок пласман.
Покрај домашните учесници, најбројни се натпреварувачите од Србија, Германија, Велика Британија и Турција.
Годинава повторно ќе се одржат четири трки – маратон на 42,195 километри, полумаратон на 21 километар, трка на пет километри и ЕУ фор Спорт штафетната трка.
Во главната маратонска трка ќе настапат околу 800 атлетичари, а меѓу македонските претставници најголем фаворит е минатогодишниот победник Дарио Ивановски. Во полумаратонот ќе учествуваат околу 3.000 тркачи.
Посебен сообраќаен режим
Поради одржувањето на маратонот, од 06:00 до 14:00 часот ќе важи посебен режим на сообраќај во повеќе делови од главниот град.
Затворени ќе бидат улиците „Македонија“ и „Димитрие Чуповски“, како и делови од булеварите „Митрополит Теодосиј Гологанов“, „Крушевска Република“, „Трета македонска бригада“ и улицата „Васил Чакаларов“ до Хром.
Изменет режим ќе има и на улицата „11 Октомври“, како и во населбата Аеродром, на потезите кон Воен базен, Мајчин дом и булеварот „Јане Сандански“ до раскрсницата со булеварот „Србија“.
Возачите ќе бидат пренасочувани по алтернативни правци, а од Министерството за внатрешни работи апелираат граѓаните да ги почитуваат насоките на полициските службеници и, доколку е можно, да ги избегнуваат сообраќајниците по кои ќе се движат тркачите.
Поддршка од институциите
Организаторите најавуваат богата програма и активности долж патеката, со цел маратонот да понуди уште подобро искуство и за учесниците и за публиката.
Најавите за годинешното издание беа презентирани на традиционалната прес-конференција, на која присуствуваа претседателот на Сојузот на спортови на Скопје, Зоран Стојановиќ, министерот за спорт Борко Ристовски, заменик-шефот на Мисијата на Европската Унија Бен Нупнау, градоначалникот на Скопје Орце Ѓорѓиевски, спортскиот директор Кире Синадиновски и секретарката Гордана Николовска.
Стојановиќ оцени дека рекордниот број учесници е доказ за меѓународниот углед што го има маратонот, додека министерот Ристовски истакна дека ваквите спортски настани придонесуваат за промоција на спортот и здравиот начин на живот.
Поддршка даде и Делегацијата на Европската Унија, а градоначалникот Орце Ѓорѓиевски ги повика скопјани да излезат покрај патеката и да им дадат поддршка на тркачите.
Во организацијата годинава ќе бидат вклучени околу 500 волонтери, распоредени на различни позиции долж трасата, кои ќе се грижат натпреварите да поминат безбедно и во најдобар ред.
