Фудбалската репрезентација на Македонија го претрпе третиот пораз во Лигата на нации, откако на Националната арена „Тодор Проески“ загуби од Шкотска со 0:2.
Гостите ја искористија својата надмоќ и со головите на Киран Боуви во шестата минута и Џон Мекгин од пенал во 70. минута стигнаа до победата. Македонија и на овој натпревар остана без постигнат погодок, продолжувајќи ја голгетерската криза во ова натпреварување.
Шкотска веднаш на стартот покажа дека ќе биде опасен противник. Енди Робертсон прв се закани со силен удар од далечина, но Столе Димитриевски одлично интервенираше.
Само неколку моменти подоцна, гостите го отворија резултатот. Киран Боуви упати удар од околу 25 метри и успеа да го совлада македонскиот голман за водство од 0:1.
Шкотска продолжи со притисокот, а Робертсон во деветтата минута повторно се најде во шанса, но неговиот удар заврши покрај голот.
Македонија првата посериозна можност ја имаше во 22. минута, кога Бојан Илиевски побегна по десната страна, но неговиот удар не го погоди посакуваниот простор.
До крајот на првото полувреме, Шкотска имаше уште една добра можност за зголемување на предноста, но Ганон-Доук шутираше над голот.
Во продолжението гостите повторно беа поопасниот тим. Во 56. минута судијата Летесие покажа на белата точка по стартот на Гаштаров, но по прегледување на снимката од ВАР системот ја промени одлуката.
Сепак, неколку минути подоцна, ВАР повторно интервенираше, а овојпат беше досуден пенал за Шкотска поради игра со рака на Бојан Миовски. Џон Мекгин беше прецизен од 11 метри и го постави конечниот резултат.
Шкотска во 83. минута остана со играч помалку по црвениот картон на Скот Мекена, но македонските фудбалери не успеаја да го искористат периодот со бројчена предност и да го постигнат првиот гол во овој циклус.
По три одиграни натпревари во Лигата на нации, Македонија останува без победа и без постигнат погодок.
