Фудбалската репрезентација на Македонија продолжува да се соочува со сериозен резултатски пад. Националниот тим е веќе десет натпревари без победа, а негативната серија во нападот достигна 607 минути без постигнат погодок.
Под водство на селекторот Гоце Седлоски, Македонија одигра шест натпревари со биланс од четири порази и две нерешени средби. Во тој период репрезентацијата не успеа да ја затресе противничката мрежа ниту еднаш, односно цели 540 минути остана без гол.
Интересно е што во овие шест натпревари Седлоски им даде шанса на дури 42 фудбалери. Иако три од средбите беа официјални и натпреварувачки, што остава помал простор за експерименти, селекторот ротираше голем број играчи во потрага по вистинското решение.
Само тројца фудбалери настапија на сите шест натпревари – Столе Димитриевски, Елиф Елмас и Висар Муслиу. Најголема минутажа имаше Димитриевски со 485 минути, Елмас одигра 473, а Муслиу 353 минути.
Пет настапи забележаа напаѓачите Елмин Растодер и Бојан Миовски, како и дефанзивецот Ѓоко Зајков. Растодер одигра 228 минути, Миовски 197, а Зајков 326 минути.
Со по четири настапи се шестмина фудбалери – Ерера (315 минути), Барди (254), Омерагиќ (234), Атанасов (225), Елези (216) и Чурлинов (214).
На три натпревари настапија Стојчевски, Фетаи, Велковски, Аломеровиќ, Ристовски, Серафимов и Николов, додека десет фудбалери имаат по два настапи. Само Матеј Гаштаров од оваа група одигра максимални 180 минути. Уште 13 играчи добија шанса на еден натпревар.
Иако беше дадена можност за настап на голем број фудбалери, резултатот останува разочарувачки – Македонија не само што не успеа да победи, туку во последниот период не им донесе ниту еден погодок на своите навивачи.
