Македонскиот репрезентативен голман Столе Димитриевски ја предводеше Валенсија до првата победа во новата сезона од Ла Лига.
Валенсија на гостински терен славеше минимално со 0:1 против Алавес во рамките на шестото коло, во натпревар кој доаѓа по турбулентниот период во клубот и промените на тренерската и директорската позиција.
На клупата на Валенсија како привремен тренер дебитираше Оскар Санчес, а неговиот тим успеа да освои важни три бода.
Единствениот погодок на натпреварот го постигна Луис Риоха во 78. минута, откако претходно ВАР технологијата му поништи гол на тимот од „Месталја“ во првото полувреме.
Столе Димитриевски одигра одличен натпревар и беше оценет како најдобар поединец во составот на Валенсија, со неколку важни интервенции за зачувување на предноста.
По шест одиграни кола, Валенсија има учинок од една победа, едно реми и четири порази, со вкупно четири освоени бодови.
Победата против Алавес може да биде важен момент за тимот во обид да излезе од резултатската криза и да фати подобар ритам во продолжението од сезоната.
