Две лица загинаа, а три се тешко повредени во директен судир на две возила што околу два часот по полноќ се случил на патот Илинден – Миладиновци, кај полициската база Брест. Според Основното јавно обвинителство Скопје, се судриле „опел корса“, управувана од 19-годишен кумановец, и „хјундаи и30“, управуван од 51-годишен жител на Марино.
На самото место загинале 51-годишниот возач на „хјундаито“ и неговиот 18-годишен син, додека неговата 18-годишна ќерка е тешко повредена. Тешки повреди добиле и 19-годишниот возач на „опелот“ и неговиот 19-годишен сопатник, кои биле пренесени во болница во животозагрозувачка состојба.
Обвинителството нареди обдукција на телата на загинатите, а се прибираат докази за утврдување на причините и околностите за несреќата.
