Ракометарите на Вардар со трофеј го отворија новото издание на македонската ракометна сезона, откако вечерва во Гевгелија го совладаа Охрид со 32-31 во финалето на Супер купот на Македонија.
Како и на претходните меѓусебни дуели на турнирите во Струга и Охрид, и овој натпревар понуди голема неизвесност, а победникот беше решен во самиот финиш.
Охрид подобро го отвори мечот и уште во седмата минута поведе со 4-1. Вардар брзо ја надополни негативата и до средината на првото полувреме целосно се врати во игра. Во 24. минута „црвено-црните“ првпат поведоа со 11-10, а на паузата заминаа со предност од 17-15.
На почетокот од вториот дел Вардар ја зголеми предноста на три гола (18-15), но Охрид повторно се врати и направи пресврт, поведувајќи со 22-20. Охриѓани ја чуваа предноста сè до 51. минута, кога водеа со 27-25, по што Вардар постигна четири гола во низа и повторно ја презеде контролата.
Во драматичната завршница, при резултат 31-31 и дваесетина секунди до крајот, Иванковиќ направи прекршок за седмерец. Одговорноста ја презеде Воркапиќ, кој беше сигурен од линијата за седум метри и му донесе водство на Вардар од 32-31. Во последниот напад Охрид имаше можност да избори продолженија, но голманот Валах го одбрани ударот на Стрмљан и го обезбеди трофејот за својот тим.
Најефикасен во редовите на Вардар беше Воркапиќ со десет погодоци.
За Вардар ова е петти трофеј во Супер купот на Македонија, по триумфите во 2017, 2018, 2019 и 2023 година. Охрид, кој првпат настапи во ова натпреварување, не успеа да стигне до историскиот прв трофеј.
