Единаесет членки на Европската Унија, меѓу кои Германија и Франција, побараа промена на начинот на кој се носат одлуките за заедничката надворешна и безбедносна политика, објави „Политико“. Наместо сегашното правило за едногласност на сите 27 членки, тие предлагаат одредени одлуки во иднина да можат да се усвојуваат со квалификувано мнозинство.
Со сегашниот систем секоја земја членка има можност со вето да блокира одлука со која не се согласува. Иницијативата ја поддржуваат Германија, Франција, Австрија, Шведска, Данска, Финска, Белгија, Холандија, Романија, Луксембург и Шпанија.
Нивните министри за надворешни работи испратиле заедничко писмо до високата претставничка на ЕУ за надворешна и безбедносна политика Каја Калас.
Во писмото се наведува дека земјите и натаму ќе се стремат кон консензус секогаш кога тоа е можно, но дека едногласноста не треба да го спречува заедничкото дејствување на Унијата.
Потписниците ја повикуваат Калас да ги разгледа можностите што ги дозволуваат постојните европски договори за поефикасно носење одлуки. Како една од главните опции се посочува таканаречената „пасарела клаузула“, со која за одредени прашања може да се воведе квалификувано мнозинство без промена на основните договори на ЕУ.
Писмото треба да биде разгледано оваа недела на состанокот на министрите за надворешни работи во Виклоу во Ирска, каде што се очекува да се разговара и за реформа на Европската служба за надворешни работи. Меѓу опциите наведени во писмото е и зајакнување на позицијата на Калас преку функција извршна потпретседателка на Европската комисија со поширок надзор врз областите на трговијата, развојната помош и одбраната.
