Во периодот од 28 до 29 август до 7:30 часот, во Македонија се регистрирани вкупно 31 пожар на отворен простор, информира Центарот за управување со кризи. Од нив, пет пожари се активни, еден е ставен под контрола, а 25 се целосно изгаснати.
Најсериозен е пожарот на територијата на општините Студеничани и Зелениково, каде што гори мешана шума на потегот Моране – Вртекица – Рамни Габер, со крак кон Палиград и во правец на Преслап. Активен е и пожарот кај Копаница во Општина Сарај, кој се шири кон Радуша и зафаќа ниска вегетација и шума. Пожари сè уште има и над Нежилово во Општина Чашка, кај Копанце во Општина Јегуновце и во атарот на Црнилиште во Општина Прилеп.
Под контрола е ставен пожарот кој започна кај Трново во Општина Гостивар и се прошири кон Битово, Заград и Страјане на територијата на Општина Македонски Брод. Во изминатото деноноќие се изгаснати 25 пожари во повеќе општини, меѓу кои Струмица, Охрид, Прилеп, Штип, Тетово, Гостивар, Делчево и Берово. ЦУК продолжува да ја следи состојбата на терен и апелира на зголемена внимателност поради опасноста од појава и ширење пожари на отворен простор.
