Меѓународниот резидуален механизам за кривични судови нареди целосна истрага за околностите под кои почина поранешниот командант на Војската на Република Српска, Ратко Младиќ.
Младиќ почина вчера додека бил хоспитализиран во Хаг, каде што ја издржуваше доживотната затворска казна изречена за геноцид, злосторства против човештвото и воени злосторства.
Претседателката на Механизмот, судијката Грасиела Гати Сантана, го назначи судијата Иан Бономи да ја води постапката за утврдување на сите факти поврзани со неговата смрт.
Од институцијата посочуваат дека отворањето истрага е стандардна процедура што се спроведува во случаи кога лице ќе почине додека е во притвор и дека само по себе не значи дека постојат сомневања за насилна смрт.
По веста за смртта на Младиќ, претседателот на Република Српска, Милорад Додик, изјави дека тој практично бил „убиен“ поради, како што тврди, несоодветен медицински третман во Хаг.
Додик оцени дека Младиќ можел да живее подолго доколку имал подобра здравствена грижа, но за овие тврдења не изнесе конкретни докази. Слични ставови изнесе и лидерот на Српската радикална партија, Воислав Шешељ.
Од друга страна, официјалните документи на Механизмот покажуваат дека здравствената состојба на Младиќ била сериозно нарушена уште пред неговата смрт.
Неговата одбрана во април годинава побара предвремено или привремено ослободување, образложувајќи дека неговото здравје било „напредно и неповратно влошено“ и дека се наоѓал во завршна фаза од животот.
Во медицинскиот извештај од 13 август било наведено дека неговата состојба нагло се влошувала и дека смртта можела да настапи во секој момент.
Барањето Младиќ да биде пуштен на слобода и да биде префрлен во Србија било одбиено. Во одлуката било наведено дека му била обезбедена палијативна грижа и постојан медицински надзор.
Механизмот најави дека ќе одржи прес-конференција посветена на смртта на Младиќ и работата на институцијата, по што се очекува да бидат соопштени дополнителни информации.
Ратко Младиќ беше осуден во 2017 година на доживотен затвор за геноцид, злосторства против човештвото и воени злосторства, вклучително и за геноцидот во Сребреница. Правосилноста на пресудата беше потврдена во 2021 година.
